تنبيه لاصحاب الشبكات..منشور امنى يتم توزيعه الان..وبداية حملة امنية واسعة النطاق على الشبكات وظهرت بكفر الشيخ..احذر ابلة فاهيتا Warning important for the owners of networks
السلام عليكم ورحمة الله وبركاته
اعضاء مدونة ميكروتيك العرب الكرام
تقوم مديريات الامن الان بتوزيع منشورات لكل امناء الشرطة والمخبرين فى تتبع اصحاب اللحى والمتزمتين والتابعين
لجماعة الاخوان المسلمين
ويقوم الجهاز الامنى الاليكترونى بتتبع ايبى اصحاب صفحات الفيس بوك الكبير ..خدو بالكم من الكبيرة..يعنى الصفحة اللى اعداد
اعضائها يتخطى ال 10 الاف والمناهضة للنظام او التى تدعم جماعة الاخوان المسلمين
ويتم القبض عليهم
وطبعا للاسف بما اننا اصحاب الشبكات فالايبى اللى هايجيبوه هايبقى الايبى الخاص بشبكتك وروترك انت
وطبعا اللى هايروح فى الرجلين هو انت وانا يامعلم
عامة انا بس عاوز اعرفكم ان افضل انواع الحلاوة هى البوادى وحلوانى ام لوز وفستق
علشان مش معقول نروح فى الرجلين وكمان العيش والحلاوة اللى هاتبقى فى السجن ماتبقاش من النوع الفاخر؟!!!!
ده يبقى ظلم يعنى!!!!
اتفضلوا حصيلة بداية الحملة الامنية...
اللى هايجننى الان ....ايه مصير ال 80 مشترك ده لو كل مشترك ب 30 جنيه يبقى الحصيلة = 2400 جنيه
ياحبيبى يابنى مش هايلم اشتراكات الشهر ده؟...
طبعا انا قريت الخبر وقدرت افك شفرة ابلة فاهيتا اللى لبسها الراجل
م .ف.م"، 24سنة طالب بكلية الهندسة
يعنى اسمه (مافيش.فايدة.منه) عمره 24 سنة وطالب فى هندسة؟؟؟(طيب ياعم سايب هندسة وعامل شبكة؟..)
عثر بحوزته على 2 جهاز لاب توب
طبعا وجدوا ان اللاب توب الاول ذكر والتانى انثى وكانوا بدون كافر يغطيهم فده يبقى فعل فاضح وتم تحرير محضر اداب
وكيسة كمبيوتر ماركة ديل
طبعا هى اكيد المرحومة كانت سيرفر ميكروتيك ربنا يستر وميلاقوش الرولات بتاعتى جواه
بس طالما ديل يبقى ماركة امريكية يبقى اكيد الراجل ده عميل امريكى ويمكن يبقى ده فى الاصل مستر اكس
و2 راوتر
اكيد كانوا هدايا من شركة لينك او تى داتا يعنى رشوة من الشركة يبقى الراجل ده لبس قضية رشوة..هايوحشنى والله
و 1 جهاز لتقوية الإشارة
حلوة حتة جهاز لتقوية الاشارة دى فكرونى بالبوستر بتاع زمان فى الاريال بتاع التلفزيون
اكيد الواد كان جايب تقوية الاشارة دى يشوف السيجما ولا قناة اسرائيل 2 يبقى واد منحرف ويستحق الاعدام رجما بالتفافة
فى ميدان عام
و2 سويتش
طبعا من السويتشات الخارقة الحارقة المارقة طالما عنده 80 مشترك حاططهم على جوز سويتشات يبقى فنان
لانى عمرى ماشوفت سويتش 40 بورت
ياريت حد يقولهم ان لسه فيه سويتشات فى الشوراع ينزلوا مخبر يلمهم لحسن فيه شتا اليومين الجاين والعيون بتاع السويتشات هاتبوظ
و 2 شاحن
دول اكيد لجوز اللابات الممسوكين اداب
و1 طبنجة (محدث صوت بخزينة فارغة)
اهى دى بقى اللى جديدة خالص....طيب انا بقول كل واحد منكم يبقى يختار المصيبة او التحبيشة اللى هاتتحط له
فأنا بقول نقسم نفسنا
يعنى جزء يتحط له هيروين
وجزء يتحط له كوكايين
وجزء يتحط له جثث مدفونة تحت سيرفر الميكروتيك غير معلومة الهوية
وجزء يتحط له اثار
عاوزين حاجات من ام 25 سنة وطالع دى مش عاوزين اى حكم والسلام...احيه بالهبل...!!!!
والله ماعراف اقولكم ايه؟..
الحرب على الشباب العاطل...ولو اشتغل يتحط تحت بند غير شرعى وحرامى...
معدش عندى كلام اقوله الصراحة
غير (حسبنا الله ونعم الوكيل)
تحياتى لكم
الى لقاء جديد مع عيش وحلاوة بوادى
:-# :-# :-#
ردحذفوالله انا طالع عين أهلى ومعمولى محضرين واحد تظاهر والتانى حرق محول كهرباء.اى والله
ردحذفحسبنا الله ونعم الوكيل
ردحذفولسه ياما نشوف
ردحذفاحسن حاجة فى الاوقات ديه انك تعمل عبيط ، اه هم اغبية لكن بيفهموا برده
ردحذفيعنى يا باشا انا راجل عامل وصلات نت زى بتاعت الدش لاكثر من 50 مشترك و مليش سلطة عليهم و ما اعرفش هم بيعملوا بيه ايه ( وده حتى لو تعرف)
وهو حيعمل معاك حركتين الرعب لزوم المنظر والشغلة و بعد كده حيسيبك
و ده بعد ما يحاول فى الاخر يشغلك عين مخبر لحسابه !