ايه افضل DNS اشتغل عليه ؟؟ سؤال هام جدا جدا لانشاء الشبكة من الاساس

82.129.130.208 لو نسخت الرقم دا وحطيته في المتصفح هيفتحلك جوجل

امال ازاي ايه العنوان دا اللي انا بكتبه عشان افتح جوجل اللي هو www.google.com

اهو العنوان دا اسمه النطاق او domain

طيب ازاي انا اما بكتب في المتصفح www.google.com بيفتح جوجل اللي هو اصلا العنوان بتاعه 82.129.130.208

هنا بقى دور الـ DNS SERVER .. ايه هو الدي ان اس سيرفر دا ؟

دا عبارة عن سيرفر ببساطة كدا متخزن فيه ان العنوان www.google.com مخصص للاي بي 82.129.130.208

انا ما بكتب في المتصفح www.google.com جهازي بيتصل بالدي ان اس سيرفر دا يقوم الدي ان اس سيرفر يبحث عن www.google.com ويشوف الاي بي المربوط بيه الدومين او النطاق دا ايه اللي هو 82.129.130.208

يعني ببساطة كدا الدي ان اس سيرفر دا عبارة عن مترجم بيترجم ليا عنوان الموقع من الشكل دا 82.129.130.208 للشكل دا www.google.com

طيب تخيل كدا من غير دي ان اس سيرفر كان الانترنت هيبقى عامل ازاي ؟؟

مكنش هيبقى في حاجة اسمها www.google.com كان هيبقى لازم تحفظ عناوين المواقع بالشكل دا 82.129.130.208 على شكل ارقام

طيب زي ما قولنا ان كل مرة بفتح فيها موقع جهازي بيتصل بالدي ان اس سيرفر ويشوف اسم الموقع دا مربوط باي بي ايه ويحولني لاي بي الموقع دا

طيب هل كل مرة انا هطلب الموقع هيروح للدي ان اس سيرفر ويشوف ايه الاي بي المربوط بيه اسم النطاق وبعدين يحولني ليه

هنا بقى بيجي دور حاجة اسمها DNS CACHE

ودا نظام بيقوم بتخزين اسم كل نطاق والايبي او العنوان الرقمي ليه

يعني انا فتحت www.google.com لاول مرة طبعا هيقوم بالعملية اللي قولنا عليها انه هيتصل بالدي ان اس سيرفر ويبحث عن العنوان الرقمي او الاي بي الخاص بالنطاق دا ويحولني اليه

تاني مرة بقى اما اجي افتح www.google.com مش هيروح للدي ان اس سيرفر ويعمل اللفة دي كلها لا هيشوف النطاق دا متخزن في الكاش بايبي ايه ويقوم يحولني للايبي اتوماتك بدون ما يقوم بالعملية اللي فاتت دي ودا دور الـ DNS CACHE

خلاص الموضوع دا ان

الـ DNS SERVER : سيرفر يقوم بدور المترجم الذي يقوم بترجمة اسم النطاق من هذا الشكل www.google.com الى هذا الشكل 82.129.130.208 لاتمكن من الاتصال بالموقع المطلوب

الـ DNS CACHE : تقنية لتخزين اسم كل نطاق والعنوان الرقمي او الاي بي الخاص به لتجنب الاتصال بالدي ان اس سيرفر كل مرة

طيب سؤال الموضوع بقى اعرف الدي ان اس الافضل ليا ازاي ؟؟

مهو ما دام عرفت ان جهازك بيقوم بالاتصال بالدي ان سيرفر عشان يترجم ليه اسم النطاق ويعرفه هو مربوط باي ايبي ويرجع الدي ان اس سيرفر يرد على جهاز وطبعا العملية دي بتعتمد على سرعة الدي ان اس سيرفر في الاستجابة

وسرعة الاستجابة بتعتمد على قوة السيرفر وقربه منك

يعني عشان تختار افضل DNS لازم يكون سيرفر قوي ما يهنجش وتختار السيرفر الاقرب عليك عشان سرعة ارسال واستقبال البيانات منه واليك تكون اسرع

وتقدر تعرف موقع الدي ان اس سيرفر عن طريق اي موقع بيطلع ليك بيانات السيرفرات ويحدد ليك مكانه وتكتب فيه الدي ان اس وهو يقولك مكان السيرفر او اعمل بنج عليه وكل ما كان البنج عليه قليل كل ما كان السيرفر افضل واسرع بالنسبة ليك